Mahitungod hin mga Pangaon

Yana nga mga panahon in medyo nag-aabot-abot an mga okasyon hin libre nga pangaraon tungod hin magsusrunod nga mga patronan. Haros kaliliwas hiton usa nga bungto o barangay, bisperas naman han usa. Sanglit kun baga buhi manggud an mga manmaratron yana nga mga takna.

An patron usa nga okasyon basi makag-paangbit han mga grasya nga nakarawat han nakalabay nga tuig an usa nga pamilya ngadto han iba. Kun nasusunod la iton igintutdo han Ginoo, labi na nga angay matagan hin okasyon an aton mga kablas nga kabugtoan nga manhiagom han aton mga andam kay hira man iton haros talagsaon la magpakakaon han medyo mag-uroupay nga mga pagkaon kay haros ha bug-os nga usa ka tuig han ira kinabuhi talagsaon manla ngani an iba makakakumpleto han tulo ka-pangaon ha usa ka adlaw samtang an iba ha aton nagpapaka-isnak pa ngani antes mangaturog ha gab-i. Sanglit aton gud gintatagusya hin maupay an aton mga kasangkayan ngan mga kakilala nga naghahatag han aton mga kablas nga kabugtoan hin higayon nga makatil-aw han kamaupay han Ginoo pinaagi han mga pagkaon nga igin-aandam naton ha aton mga lamesa ha panahon han patron.

Hinaut la unta nga diri daman abusaran han iba an kamahinatagon han aton mga nag-aandam. May-ada kasi naton igkasi mga kablas nga iton katuyoanan amo an pagtirok hin pagkaon ha kada balay nga ira masusudlan basi balunon ngadto han ira mga kabarangay. Diri gad ngani maraut an sugad nga sistema kay mamadamo gihapon an nahiaagom han mga grasya nga iginhuhura han Diyos ngadto hin pira nga katawhan. Pero siring pa hin usa namon nga sangkay diri unta pagkaragan an pagkaon kay an iba an sura la an gindadara ngan an luto in iginbibilin. Karag man, mahal pa gud iton bugas yana. Iton iba pa gud espesyal nga bugas iton gintutuon kun panahon hin patron.

Ini nga mga panhinabo in nagsusumat la ha aton hin dako ngan importante nga kamatuoran – damo an mga nagugutom nga aton mga kabugtoan. Sanglit ginhihimo nira nga okasyon an patron nga mahiagom. Pareho ini hiton eleksyon, bisna kun diri nira karuyag an usa nga kandidato kay asya manla iton okasyon nga puede hira makatagamtam hira hin iya “bulig” pinaagi hin hukip, makarawat nala kay bangin diri na mautro an panhatag hin “benepisyo”.

Kultura manggud ada hiton mga Pinoy iton paniningabot. Basta may-ada okasyon nga makatagamtam hin kaupayan kuno bisan diri kaangayan, sige na la. Bisan diri maupay pagkit-on kay okasyon naman, naghuhuho han usa ka plato nga pagkaon ngada han sudlanan bisan nagkikinulaw an nag-andam. It iba naikababalik pa gad ngani, kairo naman han ginpapatronan kay danay diri na naikahuhustoan an ira galam para han mga ginhuhunahunaan nga kadamo hin mga bisita.

Sabagay, bisan ngani an aton pira nga mga lideres in sugad hin siningabot daman han okasyon magpakakaon hin halos umabot hin dos milyones an kantidad ha duha la ngani nga pangaonan ha Estados Unidos: ha Washington DC ngan ha New York. Bangin manla kuno diri na “maulit muli” sanglit waray na ada pag-gisarusagdon, waray na ada pinaka-tigurang. Hin ka-tsismoso na manggad la han mga mantalaan ha US sanglit nahibaruan pa han mga Pinoy ha bug-os nga kalibutan han nahinabo nga “patron” diin haros an tagsa nga nakadto in nakakaon hin haros nakantidad hin P 27,000.00 gad la kada usa!

Maupay nga patron ha ngatanan!