Noynoy para Pangulo

Nauutro na daman ba iton kasaysayan?

Han 1985 nagdeklara hi Presidente Marcos nga magkamay-ada usa nga snap elections kay basi sabuton kun seryoso ba an katawhan han ira pinangangaro nga mabalyuan ngan mawara na hiya ha poder. Hadto nga tuig, hi Doy Laurel gud la an pulitiko nga ginkikitaan nga puede gud man umato han diktador. Kundi ha butnga han iya kredibilidad komo usa nga pulitiko, an mga lideres han oposisyon in nagdesisyon nga diri an iya pagin usa nga oposisyonista nga pulitiko an ginkikinahanglan han nasud kundi usa nga tawo nga makakapag-urosa han katawhan ngan magigin simbolo han nagdidilaab nga hingyap nga mabalyuan na diri la an pamunoan kundi an sistema han pulitika. Dinhi ginawas an ngaran han biyuda ni Ninoy Aquino, hi Tita Cory.

Bisan kun masuol ha dughan, ginkarawat ni Doy an ayat nga magin usa na la nga Bise Presidente. Makuri para hin usa nga pulitiko nga may kapasidad an magpaubos labi na ngadto hin usa nga tawo nga an maihahambog gud la amo an pagin usa nga biyuda hin kinikilala ngan hinihigugma nga tawo nga ginpatay basi diri na makatikang hin gi-os o kiwa pagpalugsong han nakapot han renda han pamunoan. Kundi para han kaupayan han nasud ngan han katawhan, pinabaya hi Doy ngan kinarawat na magin ikaduha na la ha listahan.

Yana nga iton oposisyon in nagbuburublag na daman ngan haros sayod na nga iton masunod nga presidente han nasud in diri na daman makakakuha han botos han kadam-an han mga Pilipino (kay bisan pa ngani hi Presidente Erap nga ura-ura ka popular in waray makahimo pakakuha han mayorya nga botos han katawhan hadton 1998) nagawas in usa nga suhestiyon nga bangin mandaw magin usa nga suklanan han tinuod nga gugma hin mga pulitiko han ira nasud.

Hi Senador Noynoy Aquino in igindidinuso hin pipira nga mga tawo ngan mga grupo basi dumalagan ha pagka-Presidente. Kun iya ini kakarawaton, magkikinahanglan ini han pagkarawat ni Senador Mar Roxas han posisyon han pagka-Bise Presidente na la ha butnga han mga preparasyon nga iya ginbuhat ngadto han iya kandidatura ha pagka-Presidente. Mahihimo ba ni Senador Roxas nga magbuhat hin sugad han kan Bise-Presidente Doy Laurel ginbuhat? Andam ba hiya igsurender an iya kalugaringon nga hingyap nga magin Presidente yana nga 2010 (ngan maghulat nala hiton 2016 ngahaw) para la makadalagan hi Senador Aquino hin pagin Pangulo?

Sugad han nawara Tita Cory, hi Senador Aquino in waray paghuhunahuna nga magin usa nga kandidato – labi na Presidente – han nasud. Bisan kun nagsiring na hiya nga puede hiya dumalagan hin posisyon ha igbaw, waray pa hiya maghimo hin pitad nga makakasiring kita nga intresado gud man hiya nga magin kandidato han Liberal Party – kay sarabot naman nga hi Senador Roxas an pagdadad-on han partido pira ka tuig na an nakalabay. Kundi an pagkamatay han anay presidente Cory in sugad hin nagbuhi na liwat han espiritu han EDSA 1986 ngan an kalayo han pakikigbisog nga natikangan han kamatay han Senador Ninoy Aquino han 1983 in nagdilaab na utro ngan nagtikang hin usa nga gi-os basi maipadayon an gintikangan han mag-asawa nga Ninoy ug Cory. Ngan kun hinanabo ini nga an mga tawo na gud man an magdesisyon nga hi Senador Aquino in dumalagan pagka-Presidente, diri la pa daman hi Senador Roxas an kinahanglan umatras. An ngatanan nga may landing pagkandidato ha posisyon ha pagka-Presidente in angay la humatag hin higayon basi diri magkabinahin an oposisyon.

Pipira na ka bulan an nahitutura basi sabuton kun ano gud man an aada ha kasingkasing han mga pulitiko naton – an katawhan o an kalugaringon nga ambisyon.